ବରଜୁ ଷେଣ୍ଢ ଘାଇ

ଏହି ପରିସ୍ଥିତିରେ ବରକୁ ଷେଣ୍ଢ ଘାଇ ଭାଙ୍ଗିବାରେ କିଏ ଦାୟୀ, ମୂଷା ନା ମନ୍ତ୍ରୀମାନେ ବୋଲି, ଦେଶର ଜନମତ ସମ୍ମୁଖରେ ଯେଉଁ ପ୍ରଚଣ୍ଡ ସମସ୍ୟା ପ୍ରକାଶ ପାଇଥିଲା, କରାଳୀର ବନ୍ୟା ସଙ୍କଟକୁ ସୁଦ୍ଧା ତାହାକୁ ସାମୟିକ ଭାବରେ ନ୍ୟୁନ କରି ଦେଇଥିଲା ।
X X X
ଭାତଖିଆ ବରଗଛକୁ ଡାହାଣ କଡ଼େ ରଖି, ଯେଉଁ ମାଟିରାସ୍ତା ବରକୁ ଷେଣ୍ଢ ଘାଇ ଗଡ଼ାଣିରୁ ବାହାରି, କରାଳୀ ଓ ମତେଇର ଦୋଆବ ଭିତରେ ଦେଇ ଚାଲି ଯାଇଅଛି; ତା’ରି ଦୁଇ କଡ଼ରେ କେତେଖଣ୍ଡି ଗ୍ରାମ ଏ ଅଞ୍ଚଳରେ ବର୍ଦ୍ଧିଷ୍ଣୁ ଓ ଜନବହୁଳ । ଯେଉଁଠାରେ ଘାଇ ଭାଙ୍ଗିଥିଲା, ତାହା ସାମ୍ନାରେ ନ ପଡ଼ି, ଏ ଗ୍ରାମମାନ ଗୋଟିଏ ପାଖରେ ଥିବା ହେତୁ, ବନ୍ୟାଜଳରେ ଏ ଗ୍ରାମମାନ ନିଶ୍ଚିହ୍ନ ହୋଇ ନଥିଲେ ହେଁ ଘରସବୁ ପାଣିରେ ବୁଡ଼ି ରହିଥିଲା । ହରିଜନ ବସ୍ତିର ଘରସବୁ ପାଣିରେ ମିଳାଇ, ଭାସି ନିଶ୍ଚିହ୍ନ ହୋଇଥିଲେ ହେଁ, ଅନ୍ୟ ସବୁବର୍ଷ ସାହିର ଘରମାନ, ପୂର୍ବରୁ ଉଚ୍ଚ ମୂଳଦୁଆ ମାନଙ୍କ ଉପରେ ତିଆରି ହୋଇଥିବା ହେତୁ ଅଧିକାଂଶ ଘରର କାନ୍ଥ ଭୁଷୁଡ଼ି ପଡ଼ିଥିଲେ ସୁଦ୍ଧା ଘରସବୁ ଏକାଥରେ ଧୋଇଯାଇ ନ ଥିଲା । ଏହି ଗ୍ରାମମାନ ଘାଇ ମୁହଁରେ ଥିବା ହେତୁ, ଏଠାକୁ ବାହାରୁ କୌଣସି ସାହାଯ୍ୟ ଆସିବା ବା ସାହାଯ୍ୟ ପଠାଇ ଲୋକମାନଙ୍କୁ ଉଦ୍ଧାର କରିବା ସମ୍ଭବ ନ ଥିଲା । ଘର ଛପର ଉପରେ, ଲୋକମାନେ ଖରାରେ, ବର୍ଷାରେ ସାତଦିନ, ସାତରାତି, ପାଣି ଛାଡ଼ିବା ପର୍ଯ୍ୟନ୍ତ ବସିରହି କୌଣସିମତେ ପ୍ରାଣରକ୍ଷା କରିଥିଲେ ।
ହୀରାଧରପୁର ନି: ପ୍ରା: ସ୍କୁଲର ହରିମାଷ୍ଟର ଏ ଅଞ୍ଚଳରେ କେବଳ ଜଣେ ବ୍ୟକ୍ତି ନୁହନ୍ତି- ଗୋଟିଏ ଅନୁଷ୍ଠାନ । ଘରପୋଡ଼ି, ବନ୍ୟା, ମହାମାରୀଠାରୁ ଆରମ୍ଭକରି, ସ୍ଥାନୀୟ ନାଟ୍ୟ ପରିଷଦ ଆନୁକୁଲ୍ୟରେ, ଗ୍ରାମ୍ୟ ଯୁବକମାନଙ୍କ ଦ୍ବାରା ବାର୍ଷିକ ଆୟୋଜିତ ନାଟ୍ୟାଭିନୟ ପ୍ରଭୃତି ପ୍ରତ୍ୟେକ ଉତ୍ସବ ଓ ନିରୁତ୍ସବ, ସୁଦିନ ଓ ଦୁର୍ଦ୍ଦିନ, ସମସ୍ତଙ୍କ ପୁରୋଭାଗରେ ହରିମାଷ୍ଟର ।